by radiodeqani | Dhj 9, 2020 | k
Prej orës 11:00 të rinjtë demokratë kanë nisur një marshim protestë për vrasjen e të riut Klodian Rasha ditën e djeshme nga një policë, i cili tashmë është i arrestuar.
Të rinjtë me pankarta në duar po marshuan nga Ministria e Brendshme – Bulevard – Kryeministri.
Ata mbajnë në dorë si simbolikë, dy hurma, të cilat i mbante në dorë 25-vjeçari para se të vritej.
Të rinjtë bëjnë thirrje që të dorëhiqet ministri i Brendshëm, Sandër Lleshaj.
Kujtojmë, se punonjësi i Policisë, efektiv i Shqiponjave, siç bëri me dije policia në njoftim të saj për ngjarjen, i ka bërë thirrje të ndalonte të riut, por Rasha nuk i është bindur urdhrit për të ndaluar dhe efektivi e ka qëlluar.
25-vjeçari u qëllua shumë afër shtëpisë së tij rreth orës 1 e 45. Ndërkohë arma e Rashës, siç njoftoi policia është gjetur 100 metra nga vendi i ngjarjes, çka tregon se nuk ka pasur shkëmbim zjarri me policinë. /TCH/
by radiodeqani | Dhj 8, 2020 | k
Ish Sekretarja e Shtetit të SHBA-së, Madeliene Albright, ka thënë se ndërhyrja e ushtrisë amerikane dy dekada më parë bashkë me aleatët ndërkombëtarë ka qenë veprim i duhur.
Në fjalimin e saj në Komitetin për Punë të Jashtme të Kongresit të SHBA-së, ajo ka thënë se janë Kina dhe Rusia që zhvillojnë propagandë kundër SHBA-së, në vendet e Ballkanit Perëndimor.
“Besoj se SHBA dhe aleatët bën gjënë e duhur duke i dhënë fund gjakderdhjes. Është me rëndësi që të ketë një perspektivë të re për Ballkanin, që tash është më paqësor”, është shprehur ajo.
“Vendet nuk janë kthyer në dhunë ndëretnike, por synojnë të bashkohen në BE. Ato do të jenë partnerë të administratës së re të Joe Biden”.
“Megjithatë korrupsioni mbetet shqetësim për këto vende. Kina dhe Rusia kanë ndikim në rajon duke bërë propagandë anti SHBA-së. Mbështetja e këtij rajoni duhet të jetë prioritet. Administrata e ardhshme duhet të ketë një strategji të re me tri elemente: Duhet të kemi bashkëpunim me BE. Gjashtë vendet e Ballkanit Perëndimor duan të jenë pjesë e BE dhe SHBA mund të ndikojë te disa vende që të ndihmohet ky rajon. Duhet të ndiqet që të ketë strategji për secilin vend veç e veç.”
“SHBA dhe BE duhet të punojnë bashkë me iniciativa në Kosovë, Bosnjë… në reformën politike. Kosova duhet të bëhet shtet normal, duke u bërë pjesë e BE-së dhe t’i ketë të gjitha të drejtat ndërkombëtare për ta mbrojtur territorin e saj”.
Ajo ka thënë se beson që Biden do t’i kushtojë vëmendjen e duhur vendeve të Ballkanit Perëndimor.
Albright ka folur për Gjykatën Speciale pas pyetjes që i është drejtuar nga kryetari i këtij komiteti Eliot Engel.
“Nuk po e ekzagjeroj kur po them se sa shumë kohë, kur isha në Kombet e Bashkuara dhe më pas si Sekretare e Shtetit, kemi kaluar duke u marrë me çështjen e Ballkanit. Një nga votat e mia të para në Kombet e Bashkuara ishte për krijimin e Tribunalit për Krime Lufte për ish-Jugosllavinë. Është fakt që Gjykata Speciale e Kosovës tani po merret me atë që ata po thonë se janë krime lufte që janë kryer”.
Albright ka thënë se Kosova dhe Serbia duhet të përpiqen që të komunikojnë dhe të zgjidhin çështjet e pazgjidhura së bashku.
“Kemi pasë gjithmonë probleme në përpjekjen për të treguar rolin e serbëve në pastrimin etnik. Duhet të shohim me shumë kujdes se çfarë mund të bëjë ligji, sepse është e mundshme që të identifikohet faji individual dhe jo faji kolektiv. Mendoj që duhet të theksohet se vendet e Ballkanit që komunikonin me njëra-tjetrën duhet ta bëjnë sërish këtë dhe jo të vendosin gjithçka në kontekstin e konfliktit etnik, por të përpiqen të zgjidhin disa probleme së bashku”, tha ajo.
by radiodeqani | Dhj 8, 2020 | k
Brenda territorit të Kosovës, aktualisht janë duke u bërë gërmime vlerësuese për zhvarrosjen e mbetjeve mortore gjatë luftës në Kosovë.
Në një fshat të Gjilanit janë duke u realizuar gërmime, ndërkohë që pritet që gjatë këtyre ditëve të fillojnë edhe në një lokacion të Rahovecit.
Komisioni Qeveritar për të Pagjeturit po kërkojnë bashkëpunim nga familjarët për dhënien e gjakut dhe krahasimin e tyre me mbetjet mortore. Meqë shumë prej tyre po refuzojnë një gjë të tillë, pasi të njëjtit ende besojnë se familjarët e tyre gjenden në burgje private në Serbi.
Kështu u tha në mbledhjen e sotme të këtij komisioni, ku udhëheqësi i Zyrës në Komisionin Qeveritar për të Pagjeturit, Kushtrim Gara ka folur për kërkimet që janë duke u bërë në Kizhevak të Rashkës, duke shtuar se janë duke u zhvilluar kërkime edhe në një pjesë të Gjilanit.
Ai ka përmendur edhe takimin në Kizhevak të dy delegacioneve, të Kosovës dhe Serbisë, ku tha se janë monitoruar nga afër punimet në këtë lokacion. Gara theksoi se që nga data 16 e muajit të kaluar, janë të angazhuar në gërmimet në lokacionin Kizhevak.
“Sa i përket gërmimeve vlerësuese brenda territorit të Kosovës, brenda periudhës kohore për të cilën po raportojmë, kanë qenë dy lokacione në varreza të besimtarëve myslimanë në Mitrovicë të Veriut. Dhe këto dy lokacione që janë proceduar gjatë kësaj kohe, konkretisht në lokacionin me 16 tetor 2020, dhe lokacioni i procedurave me 29 tetor 2020, na dërgojnë në të dhënat që i kemi prezantuar paraprakisht dhe kemi biseduar që gjatë këtij viti, ose deri më tani në varrezat e besimtarëve myslimanë përfshirë dy këto lokacione janë proceduar gjithsejtë katër lokacione. Nga të cilat janë zhvarrosur mbetjet mortore të paktën gjashtë viktimave të luftës”, tha Gara, raporton kp.
Krahas lokacioneve në Mitrovicë, Gara shtoi se kanë qenë edhe dy lokacione në të cilat janë fokusuar gjatë kësaj kohe. Veç tjerash ka njoftuar se aktualisht janë duke u kryer gërmime vlerësuese në Gjilan.
“Është lokacioni në fshatin Polan të Istogut dhe lokacioni në fshatin Suriganë të komunës së Skenderajt. Edhe lokacioni në Polan edhe në Suriganë janë vazhdimësi e punës që është realizuar gjatë muajve paraprakë. Në Polan është kryer një gërmim vlerësues diku në muajin qershor, dhe pastaj në bazë të informatave vlerësuese më 21 tetor janë kryer gërmimet vlerësuese, si rezultat i të cilave janë zhvarrosur mbetjet mortore të një viktime të luftës. Ndërsa, në fshatin Suriganë gërmimet janë realizuar më 30 dhe 31 tetor ku janë gjetur dhe zhvarrosur mbetjet mortore të dy viktimave të luftës. Sot janë duke u realizuar gërmimet vlerësuese edhe në një fshat të Gjilanit, dhe besoj që në ditët në vijim do të shqyrtohen mundësitë për të përfshirë në agjendë të gërmimeve edhe në një lokacion në komunën e Rahovecit”, ka njoftuar Gara.
Ai po ashtu ka njoftuar se gjatë kësaj periudhe ka qenë një rast i dorëzimit të mbetjeve mortore të një familje në Klinë.
E, kryetari i Komisionit Qeveritar për Persona të Zhdukur, Ramë Manaj tha se duhet të jepet përgjigje për mbetjet mortore në Institutin e Mjekësisë Ligjore, ku thuhet se janë mbi 300 mbetje.
Ai tha se kanë propozuar një draft të planit të veprimit, i cili përfshin katër objektiva.
“Në vazhdën e angazhimeve për ndriçimin e fatit dhe vendndodhjes për persona të zhdukur dhe zgjidhjes së çështjes të mbetjeve mortore Komisioni Qeveritar për Persona të Zhdukur ka draftuar këtë plan-veprimi në përmbushje të objektivave të përshkruar në këtë dokument edhe në konsultim me partnerët ndërkombëtarë të angazhuar në këtë proces. Ky draft përfshin katër objektiva: digjitalizimin e arkivit, skanimin e dokumentacionit, trajtimin e mëtejmë të rasteve të mbetjeve mortore të paidentifikuara, rasteve që janë një kapitull i veçantë në gjithë këtë periudhë pothuajse më shumë se 10-vjeçare. Bashkëpunimi me familjet dhe organizatat vendore dhe ndërkombëtare dhe bashkëpunimi bilateral dhe rajonal”, tha Manaj.
Ai theksoi se skanimi i materialeve duhet të bëhet për gjithë procesin. Me këtë është pajtuar edhe kryetari i delegacionit të Kosovës, Ibrahim Makolli, i cili tha se mekanizmi i shtetit duhet të ketë dokumentacion, meqë përveç ndjekjes penale të atyre që kanë bërë krimin nevojitet një arkiv e tillë.
“Ne me ligj e kemi obligim që të hartojmë listën e personave të zhdukur. Listë e cila del nga të dhënat anti-mortum. Askush nuk mund ta shtojë dhe as ta heqë një emër, pa pasur këtë dokument. Sot aktualisht në bazë të këtyre emrave, figurojnë 1638 persona të zhdukur dhe nuk mund të përditësohet kjo listë pa pasur dokument bazë”, tha Manaj.
Drejtori i Institutit të Mjekësisë Ligjore Arsim Gërxhaliu, tha se prej vitit ’99 deri në vitin 2003 kanë punuar ekipet e Tribunalit të Hagës në Kosovë, ku shtoi se në atë kohë mbi 4000 raste janë pranuar pa analiza të ADN-së, për çka sipas tij identifikimi është bërë në mënyrë klasike.
“Jemi në këtë situatë ku është identifikuar edhe një numër i familjeve, të cilët nuk kanë dhënë edhe më tutje gjak për t’u bërë krahasimi. Edhe pse bazuar në atë që thatë ju më herët në të dhënat anti-mortem ka dyshime që disa prej tyre mund të kenë anëtarët e familjes në Institutin tonë, në ato mbetje mortore. Por, të njëjtat familje kanë refuzuar dhënien e gjakut, sepse edhe më tutje besojnë që mos i kanë të gjallë në burgjet private në Serbi. Kjo do të jetë edhe një prej sfidave të komisionit dhe të ndërmarrjeve të cilat të tentohet që këto familje t’ shpjegohet rëndësia e kësaj… Mbi 2000 familjarë i kanë varrosur në mënyrë vetanake pa autopsi dhe pa analiza të ADN-së”, tha ai.
Gërxhaliu tha se kjo është shumë e vështirë, pasi familjarët besojnë ende që më të dashurit e tyre janë të gjallë dhe se për këtë ka kërkuar bashkëpunim nga familjet dhe organizatave vendore.
by radiodeqani | Dhj 8, 2020 | k
Në një nga dokumentet e para të Qeverisë së re të Malit të Zi dhe të Ministrisë së Shëndetësisë së këtij vendi, i cili u referohet masave të reja kundër pandemisë COVID-19, Kosova është shënuar me fusnotë.
Yllin pranë emrit (Kosova*) e vendosin disa vende që ende nuk e kanë njohur shtetin e Kosovës.
Në të gjitha dokumentet e deritashme zyrtare të Qeverisë malazeze, Kosova është trajtuar në përputhje me vendimin për njohjen e pavarësisë së saj, përkatësisht pa yll në emër.
Qeveria e re malazeze, e udhëhequr nga kryeministri Zdravko Krivokapiq, e ka shënuar Kosovën me fusnotë në një dokument për masat kundër pandemisë, i cili ka të bëjë me “tranzitin e banorëve të Bosnje dhe Hercegovinës, Serbisë, Kosovës* dhe Shqipërisë përmes Malit të Zi”, transmeton Telegrafi.
Në krye të Ministrisë së Shëndetësisë në Mal të Zi është mjekja Jelena Boroviniq Bojoviq.
Qeveria e re e Malit të Zi është zgjedhur më 4 dhjetor.
Ajo përbëhet nga tre koalicione dhe dominohet nga partia Fronti Demokratik.
Kjo e fundit, në të kaluarën, është zotuar se do ta tërheqë njohjen e Kosovës.
Qeveria e Malit të Zi e ka njohur pavarësinë e Kosovës disa muaj pas shpalljes së saj, në vitin 2008. /Telegrafi/
by radiodeqani | Dhj 8, 2020 | k
Kryetari i Komitetit për Punë të Jashtme në Dhomën e Përfaqësuesve të SHBA-së, Eliot Engel, tha se kushdo që ka kryer krime në Kosovë duhet të mbahet përgjegjës dhe “jo të ndiqet vetëm një etni”.
Me këto komente, Engel iu referua Gjykatës Speciale për krime lufte në Kosovë, teksa foli në një seancë dëgjimore për Ballkanin Perëndimor.
“Kushdo që ka kryer krime lufte, nga cilido anë, duhet të ndiqet penalisht dhe të vihet para drejtësisë. Pikë. Por, më duhet të pyes: çfarë është drejtësia në rastin e luftës në Kosovë? Tani për tani, duket se Serbia – pala përgjegjëse për shumicën e krimeve të luftës – nuk përballet me asnjë presion në vend ose nga bashkësia ndërkombëtare për t’i sjellë para drejtësisë autorët e saj [të krimeve]”, tha Engel.
Në të njëjtën kohë, shtoi ai, “viktima në luftë, Kosova, është detyruar të krijojë një gjykatë hibride, me prokurorë dhe gjykatës ndërkombëtarë”.
“Miq, nëse kjo do të ishte Danimarkë, ne do të mendonim se diçka nuk është në rregull”, tha Engel.
Ai tha se nëse kosovarët kanë kryer krime, ata duhet të mbahen përgjegjës, por në statutin e gjykatës kujtoi se nuk shkruan se duhet të ndiqet vetëm një etni.
“Por, kjo është pikërisht ajo që po ndodh”, theksoi Engel.
“E paralajmëroj fuqishëm gjykatën, Shtetet e Bashkuara dhe aleatët tanë se nuk duhet të lejojmë që ajo të bëhet gjykatë etnike, sepse nëse lejojmë, ne vetëm se i mbajmë gjallë problemet që kanë shkaktuar vështirësi, konflikte dhe përçarje në rajon”, tha Engel.
Gjykata Speciale ka konfirmuar aktakuzën për krime lufte kundër disa ish-eprorëve të Ushtrisë Çlirimtare të Kosovës, në mesin e tyre: Hashim Thaçi, Kadri Veseli, Rexhep Selimi, Jakup Krasniqi dhe Salih Mustafa.
Engel tha se gjykata ka juridiksion “mbi të gjitha krimet e luftës, të kryera në Kosovë, pa marrë parasysh se cila palë i ka kryer ato”.
Gjykata Speciale heton krimet e pretenduara të pjesëtarëve të Ushtrisë Çlirimtare të Kosovës, të kryera ndaj pakicave etnike dhe rivalëve politikë, të cilat përmenden në raportin e Këshillit të Evropës të vitit 2011, autor i të cilit është senatori zviceran, Dick Marty.
Komente Së Fundi